آیت ۶۷:  وَاِذَا مَسَّکُمُ الضُّرُّ فِی الْْبَحْر:   «اورجب تمہیں کوئی تکلیف پہنچتی ہے سمندر میں»

            جب کشتی طوفان میں گھر جاتی ہے اور موت سامنے نظر آنے لگتی ہے تو:

              ضَلَّ مَنْ تَدْعُوْنَ اِلَّآ اِیَّاہُ:   «گم ہو جاتے ہیں وہ سب جنہیں تم پکارتے ہو، سوائے اُس (ایک اللہ) کے۔»

            اس وقت تمہیں اپنے ان معبودوں میں سے کوئی بھی یاد نہیں رہتا جنہیں تم عام حالات میں اپنا مددگار سمجھتے ہو۔ اس آڑے وقت میں تم صرف اللہ ہی کو مدد کے لیے پکارتے ہو۔  یہ مضمون قرآن میں متعدد بار آ چکا ہے۔

              فَلَمَّا نَجّٰکُمْ اِلَی الْبَرِّ اَعْرَضْتُمْ وَکَانَ الْاِنْسَانُ کَفُوْرًا:   «پھر جب وہ تمہیں بچا لاتا ہے خشکی کی طرف تو تم منہ موڑ لیتے ہو۔ اور انسان بڑا ہی نا شکرا ہے۔»