آیت ۴۱: اَلَمْ تَرَ اَنَّ اللّٰہَ یُسَبِّحُ لَہُ مَنْ فِی السَّمٰوٰتِ وَالْاَرْضِ: «کیا تم دیکھتے نہیں ہو کہ اللہ کی تسبیح کرتے ہیں جو کوئی آسمانوں اور زمین میں ہیں »

            نہ صرف آسمانوں اور زمین کی تمام مخلوقات اللہ کی تسبیح کرتی ہیں بلکہ ان دونوں (آسمان و زمین) کے مابین جو مخلوق ہے وہ بھی اس میں شامل ہیں۔

            : وَالطَّیْرُ صٰٓفّٰتٍ  کُلٌّ قَدْ عَلِمَ صَلَا تَہُ وَتَسْبِیْحَہُ: «اور پروں کو پھیلائے ہوئے پرندے بھی۔ ہر ایک نے جان لی ہے اپنی نماز اور تسبیح۔»

            یہی مضمون سوره بنی اسرائیل کی آیت: ۴۴ میں اس طرح آیا ہے:  وَاِنْ مِّنْ شَیْئٍ اِلاَّ یُسَبِّحُ بِحَمْدِہِ وَلٰکِنْ لاَّ تَفْقَہُوْنَ تَسْبِیْحَہُمْ: کہ کوئی چیز اس کائنات میں ایسی نہیں ہے جو اللہ کی تسبیح و تحمید نہ کر رہی ہو، لیکن تم لوگوں کو ان کے طریقہ تسبیح کا شعور نہیں ہو سکتا۔

            : وَاللّٰہُ عَلِیْمٌ  بِمَا یَفْعَلُوْنَ: «اور اللہ خوب جانتا ہے جو وہ کرتے ہیں۔»