آیت ۳۵   یُّرِیْدُ اَنْ یُّخْرِجَکُمْ مِّنْ اَرْضِکُمْ بِسِحْرِہٖ فَمَا ذَا تَاْمُرُوْنَ: ’’یہ چاہتا ہے کہ اپنے اس جادو کے بل پر تمہیں تمہارے ملک سے نکال باہر کرے، تو تم لوگ کیا مشورہ دیتے ہو؟‘‘

      لغوی اعتبار سے ’’امر‘‘ کے معنی حکم کے بھی ہیں اور مشورہ کے بھی، مگر یہاں یہ لفظ مشورہ کے معنی دے رہا ہے۔ فرعون کے اس فقرے سے اس کی تشویش صاف ظاہر ہو رہی ہے۔ گویا صورتِ حال اس کے اندازے سے کہیں بڑھ کر پیچیدہ اور گھمبیر تھی۔