آیت 143:  وَلَمَّا جَآءَ مُوْسٰی لِمِیْقَاتِنَا وَکَلَّمَہ رَبُّہ: ’’اور جب موسیٰ پہنچے ہمارے وقت ِمقررہ پر اور ان سے کلام کیا ان کے رب نے‘‘

            قَالَ رَبِّ اَرِنِیْٓ اَنْظُرْ اِلَیْکَ قَالَ لَنْ تَرٰنِیْ: ’’انہوں نے درخواست کی کہ اے میرے پروردگار! مجھے یارائے نظر دے کہ میں تجھے دیکھوں۔ اللہ نے فرمایا کہ تم مجھے ہر گز نہیں دیکھ سکتے‘‘

            وَلٰکِنِ انْظُرْ اِلَی الْجَبَلِ فَاِنِ اسْتَقَرَّ مَکَانَہ فَسَوْفَ تَرٰنِیْ: ’’لیکن ذرا اس پہاڑ کو دیکھو‘ اگر وہ اپنی جگہ پر کھڑا رہ جائے تو تم بھی مجھے دیکھ سکو گے۔‘‘

            فَلَمَّا تَجَلّٰی رَبُّہ لِلْجَبَلِ جَعَلَہ دَکًّا:  ’’تو جب اُس کے رب نے اپنی تجلی ڈالی پہاڑ پر تو کر دیا اس کو ریزہ ریزہ‘‘

            جَلَا یَجْلُو جَلَاءً کے معنی ہیں ظاہر کرنا‘ روشن کرنا۔ اس سے ’’تجلّی‘‘باب تفعل ہے‘ یعنی کسی چیز کا خود روشن ہو جانا۔ یہ اللہ تعالیٰ کی ذات کی تجلی تھی جو پہاڑ پر ڈالی گئی جس سے پہاڑ ریزہ ریزہ ہو گیا۔

            وَّخَرَّ مُوْسٰی صَعِقًا:  ’’ اور موسیٰ گر پڑے بے ہوش ہو کر‘‘

            تجلی ٔباری تعالیٰ کے اس بالواسطہ مشاہدے کو بھی حضرت موسیٰ برداشت نہ کر سکے۔ پہاڑ پر تجلی کا پڑنا تھا کہ آپ بے ہوش ہو کر گر پڑے۔

            فَلَمَّآ اَفَاقَ قَالَ سُبْحٰنَکَ تُبْتُ اِلَیْکَ وَاَنَا اَوَّلُ الْمُؤْمِنِیْنَ:  ’’ پھر جب آپ کو افاقہ ہوا تو کہا کہ (اے اللہ!) تو پاک ہے‘ میں تیری جناب میں توبہ کرتا ہوں اور میں ہوں پہلا ایمان لانے والا!‘‘

            جب حضرت موسیٰ کو ہوش آیا تو آپ نے اللہ تعالیٰ کے حضور اپنے سوال کی جسارت پر توبہ کی اور عرض کیا کہ اے اللہ! میں تجھے دیکھے بغیر سب سے پہلے تجھ پر ایمان لانے والا ہوں۔