آیت 84:  وَاَمْطَرْنَا عَلَیْہِمْ مَّطَرًا فَانْظُرْ کَیْفَ کَانَ عَاقِبَۃُ الْمُجْرِمِیْن:  ’’اور ہم نے برسائی ان پر ایک بارش‘ تو دیکھو کیا انجام ہوا مجرموں کا!‘‘

            یہ پتھروں کی بارش تھی اور ساتھ شدید زلزلہ بھی تھا جس سے ان کی بستیاں الٹ کر بحیرہ مردار کے اندر دفن ہو گئیں۔ قومِ لوط اہل مکہ سے زمانی اور مکانی لحاظ سے زیادہ دور نہیں تھی‘ اس قوم کے قصے اہل ِعرب کی تاریخی روایات کے اندر موجود تھے۔ چنانچہ اہل مکہ اس قوم کے حسرتناک انجام سے خوب واقف تھے۔