آیت ۱۰۹: اَفَمَنْ اَسَّسَ بُنْیَانَہ عَلٰی تَقْوٰی مِنَ اللّٰہِ وَرِضْوَانٍ خَیْرٌ: ‘‘تو کیا بھلا جس نے اپنی عمارت کی بنیاد رکھی ہو اللہ کے تقویٰ اور اس کی رضا پر‘ وہ بہتر ہے‘‘

            اَمْ مَّنْ اَسَّسَ بُنْیَانَہ عَلٰی شَفَا جُرُفٍ ہَارٍ فَانْہَارَ بِہ فِیْ نَارِ جَہَنَّمَ: ‘‘یا وہ کہ جس نے اپنی تعمیر کی بنیاد رکھی ایک ایسی کھائی کے کنارے پر جو گرا چاہتی ہے‘ تو وہ اس کو لے کر گر گئی جہنم میں ؟‘‘

            یعنی جب انسان کوئی عمارت تعمیر کرنا چاہتا ہے تو اس کے لیے کسی مضبوط اور ٹھوس جگہ کا انتخاب کرتا ہے۔ اگر وہ کسی کھوکھلی جگہ پر یا کسی کھائی وغیرہ کے کنارے پر عمارت تعمیر کرے گا تو جلد یا بدیر وہ عمارت گر کر ہی رہے گی۔ دراصل یہ منافقین کی تدبیروں اور سازشوں کی مثال دی گئی ہے کہ ان کی مثال ایسی ہے جیسے وہ جہنم کی گہری کھائی کے کنارے پر اپنی عمارتیں تعمیر کر رہے ہوں‘ چنانچہ وہ کنارہ بھی گر کر رہے گا اور خود ان کو اور ان کی تعمیرات کو بھی جہنم میں گرائے گا۔

            وَاللّٰہُ لاَ یَہْدِی الْقَوْمَ الظّٰلِمِیْنَ: ‘‘اور اللہ ایسے ظالم لوگوں کو راہ یاب نہیں کرتا۔‘‘