آیت114: وَمَا کَانَ اسْتِغْفَارُ اِبْرٰہِیْمَ لِاَبِیْہِ اِلاَّ عَنْ مَّوْعِدَۃٍ وَّعَدَہَآ اِیَّاہُ: ‘‘اور نہیں تھا استغفار کرنا ابراہیم کا اپنے والد کے حق میں مگر ایک وعدے کی بنیاد پر جو انہوں نے اس سے کیا تھا۔‘‘

            جب حضرت ابراہیم کے والد نے آپ کو گھر سے نکالا تھا تو جاتے ہوئے آپ نے یہ وعدہ کیا تھا‘ اس وعدے کا ذکر سوره مریم میں اس طرح کیا گیا ہے:  سَاَسْتَغْفِرُ لَکَ رَبِّیْ اِنَّہُ کَانَ بِیْ حَفِیًّا.  ‘‘میں اپنے رب سے آ پ کے لیے بخشش کی درخواست کروں گا‘ بے شک وہ مجھ پر بڑا مہربان ہے۔‘‘

            فَلَمَّا تَبَیَّنَ لَہ اَنَّہُ عَدُوٌّ لِلّٰہِ تَبَرَّاَ مِنْہُ اِنَّ اِبْرٰہِیْمَ لَاَوَّاہٌ حَلِیْمٌ: ‘‘اور جب آپ پر واضح ہوگیا کہ وہ اللہ کا دشمن ہے تو آپ نے اس سے اعلانِ بیزاری کر دیا۔ یقینا ابراہیم بہت دردِ دل رکھنے والے اور حلیم الطبع تھے۔‘‘

            حضرت ابراہیم وعدے کے مطابق اپنے والد کی زندگی میں اس کے لیے دعا کرتے رہے کہ جب تک وہ زندہ تھا تو امید تھی کہ شایدا للہ تعالیٰ اسے ہدایت کی توفیق دے دے‘ لیکن جب اس کی موت واقع ہو گئی تو آپ نے استغفار بند کر دیا کہ زندگی میں جب وہ کفر پر ہی اڑا رہا اور اسی حالت میں اس کی موت واقع ہو گئی تو ثابت ہو گیا کہ اب اس کے لیے توبہ کا دروازہ بند ہو گیا ہے۔