الـتغابن

آسمانوں اور زمین میں جو چیز بھی ہے، وہ اﷲ کی تسبیح کرتی ہے، اور بادشاہی اُسی کی ہے، اور تعریف اُسی کی، اور وہ ہر چیز پر پوری قدرت رکھتا ہے

وہی ہے جس نے تمہیں پیدا کیا، پھر تم میں سے کوئی کافر ہے، اور کوئی مومن۔ اور جو کچھ تم کرتے ہو، اﷲ اُسے خوب دیکھتا ہے

اُس نے آسمانوں اور زمین کو برحق پیدا کیا ہے، اور تمہاری صورتیں بنائی ہیں ، اور تمہاری صورتیں اچھی بنائی ہیں ، اور اُسی کی طرف آخر کار (سب کو) پلٹ کر جانا ہے

آسمانوں اور زمین میں جو کچھ ہے، وہ اُسے جانتا ہے، اور جو کچھ تم چھپ کر کرتے ہو اور جو کچھ کھلم کھلا کرتے ہو، اُس کا بھی اُسے پورا علم ہے، اور اﷲ دلوں کی باتوں تک کا خوب جاننے والا ہے

کیا تمہارے پاس اُن لوگوں کے واقعات نہیں پہنچے جنہوں نے پہلے کفر اِختیار کیا تھا، پھر اپنے کاموں کا وبال چکھا، اور (آئندہ) ان کے حصے میں ایک دردناک عذاب ہے؟

یہ سب کچھ اس لئے ہو اکہ اُن کے پاس اُن کے پیغمبر روشن دلائل لے کر آتے تھے تو وہ کہتے تھے کہ : ’’ کیا (ہم جیسے) انسان ہیں جو ہمیں ہدایت دیں گے؟ غرض انہوں نے کفر اِختیار کیا، ا ور منہ موڑا، اور اﷲ نے بھی بے نیازی برتی، اور اﷲ بالکل بے نیاز ہے، بذاتِ خود قابلِ تعریف !

جن لوگوں نے کفر اَپنا لیا ہے، وہ یہ دعویٰ کرتے ہیں کہ اُنہیں کبھی دوبارہ زندہ نہیں کیا جائے گا۔ کہہ دو : ’’ کیوں نہیں؟ میرے پروردگار کی قسم ! تمہیں ضرور دوبارہ زندہ کیاجائے گا، پھر تمہیں بتایا جائے گاکہ تم نے کیا کچھ کیا تھا، اور یہ اﷲ کیلئے معمولی سی بات ہے۔‘‘

لہٰذا اﷲ پر اور اُس کے رسول پر اور اُس روشنی پر اِیمان لاؤ جو ہم نے نازل کی ہے، اور تم جو کچھ کرتے ہو، اﷲ اُس سے پوری طرح باخبر ہے

(یہ دُوسری زندگی) اُس دن (ہوگی) جب اﷲ تمہیں روزِ حشر میں اِکٹھا کرے گا۔ وہ ایسادن ہوگا جس میں کچھ لوگ دُوسروں کو حسرت میں ڈال دیں گے، اور جو شخص اﷲ پر اِیمان لایا ہوگا، اور اس نے نیک عمل کئے ہوں گے، اﷲ اُس کے گناہوں کو معاف کردے گا، اور اُس کے ایسے باغوں میں داخل کرے گا جن کے نیچے نہریں بہتی ہوں گی، جن میں وہ ہمیشہ ہمیشہ رہیں گے۔ یہ ہے بڑی کامیابی

اور جن لوگوں نے کفر اِختیار کیا ہوگا، اور ہماری آیتوں کو جھٹلایا ہوگا، وہ دوزخ والے ہوں گے جس میں وہ ہمیشہ رہیں گے، اور وہ بہت بُرا ٹھکانا ہے