الـتحريم

اے نبی ! جو چیز اﷲ نے تمہارے لئے حلال کی ہے، تم اپنی بیویوں کو خوشنودی حاصل کرنے کیلئے اُسے کیوں حرام کرتے ہو؟ اور اﷲ بہت بخشنے والا، بہت مہربان ہے

اﷲ نے تمہاری قسموں سے نکلنے کا طریقہ مقرر کر دیا ہے۔ اور اﷲ تمہارا کارساز ہے، اور وہی ہے جس کا علم بھی کامل ہے، حکمت بھی کامل

اور یاد کرو جب نبی نے اپنی کسی بیوی سے راز کے طور پر ایک بات کہی تھی۔ پھر جب اُس بیوی نے وہ بات کسی اور کو بتلادی، اور اﷲ نے یہ بات نبی پر ظاہر کردی تو اُس نے اُس کا کچھ حصہ جتلادیا، اور کچھ حصے کو ٹال گئے۔ پھر جب اُنہوں نے اُس بیوی کو وہ بات جتلائی تو وہ کہنے لگیں کہ : ’’ آپ کو یہ بات کس نے بتائی؟‘‘ نبی نے کہا کہ : ’’ مجھے اُس نے بتائی جو بڑے علم والا، بہت با خبرہے۔‘‘

(اے نبی کی بیویو !) اگر تم اﷲ کے حضور توبہ کر لو (تو یہی مناسب ہے) کیونکہ تم دونوں کے دل مائل ہوگئے ہیں ، اور اگر تم نبی کے مقابلے میں تم نے ایک دوسری کی مدد کی، تو (یاد رکھو کہ) اُن کا ساتھی اﷲ ہے، اور جبرئیل ہیں ، اور نیک مسلمان ہیں ۔ اور اس کے علاوہ فرشتے ان کے مددگار ہیں

اگر وہ تمہیں طلاق دے دیں تو تمہارے پروردگار کو اس بات میں دیر نہیں لگے گی کہ وہ اُن کو (تمہارے) بدلے میں ایسی بیویاں عطا فرمادے جو مسلمان، ایمان والی، طاعت شعار، توبہ کرنے والی، عبادت گذار اور روزہ دار ہوں ، چاہے پہلے اُن کے شوہر رہے ہوں ، یا کنواری ہوں

اے ایمان والو ! اپنے آپ کو اور اپنے گھر والوں کو اُس آگ سے بچاؤ جس کا ایندھن انسان اور پتھر ہوں گے۔ اُس پر سخت کڑے مزاج کے فرشتے مقرر ہیں جو اﷲ کے کسی حکم میں اُس کی نافرمانی نہیں کرتے، اور وہی کرتے ہیں جس کا اُنہیں حکم دیا جاتا ہے

اے کفر اِختیار کرنے والو ! آج معذرتیں پیش مت کرو۔ تمہیں اُنہی اعمال کا بدلہ دیا جارہا ہے جو تم کیا کرتے تھے

اے ایمان والو ! ا ﷲ کے حضور سچی توبہ کرو۔ کچھ بعید نہیں کہ تمہارا پروردگار تمہاری بُرائیاں تم سے جھاڑ دے، اور تمہیں ایسے باغات میں داخل کر دے جن کے نیچے نہریں بہتی ہیں ، اُس دن جب اﷲ نبی کو اور جو لوگ ان کے ساتھ ایمان لائے ہیں اُن کو رُسوا نہیں کرے گا۔ اُن کا نور اُن کے آگے اور اُن کی دائیں طرف دوڑ رہا ہوگا۔ وہ کہہ رہے ہوں گے کہ : ’’ اے ہمارے پروردگار ! ہمارے لئے اس نور کو مکمل کر دیجئے، اور ہماری مغفرت فرمادیجئے۔ یقینا آپ ہر چیز پر پوری قدرت رکھنے والے ہیں ۔‘‘

اے نبی ! کافروں اور منافقوں سے جہاد کرو، اور اُن کے مقابلے میں سخت ہو جاؤ۔ اور ان کا ٹھکانا جہنم ہے، اور وہ بہت بُرا ٹھکانا ہے

جن لوگوں نے کفر اِختیار کیا ہے، اﷲ اُن کیلئے نوح کی بیوی اور لوط کی بیوی کو مثال کے طور پر پیش کرتا ہے۔ یہ دونوں ہمارے ایسے بندوں کے نکاح میں تھیں جو بہت نیک تھے۔ پھر انہوں نے ان کے ساتھ بے وفائی کی، تو وہ دونوں اﷲ کے مقابلے میں اُن کے کچھ بھی کام نہیں آئے، اور (اُن بیویوں سے) کہا گیا کہ : ’’ دُوسرے جانے والوں کے ساتھ تم بھی جہنم میں چلی جاؤ۔‘‘