غافر

اﷲ ہی تو ہے جس نے تمہارے لئے رات بنائی، تاکہ تم اُس میں سکون حاصل کرو، اور دِن کو دیکھنے والا بنایا۔ حقیقت یہ ہے کہ اﷲ لوگوں پر فضل فرمانے والا ہے، لیکن اکثر لوگ شکر اَدا نہیں کرتے

وہ ہے اﷲ جو تمہارا پروردگار ہے، ہر چیز کا پیدا کرنے والا۔ اُس کے سوا کوئی معبود نہیں ہے۔ پھر کہاں سے کوئی چیز تمہیں اوندھا چلا دیتی ہے؟

اسی طرح وہ لوگ بھی اوندھے چلے تھے جو (پہلے) ہماری آیتوں کا انکار کیا کرتے تھے

اﷲ ہی تو ہے جس نے تمہارے لئے زمین کو قرار کی جگہ بنایا، اور آسمان کو ایک گنبد، اور تمہاری صورتت گری کی، اور تمہاری صورتوں کو اچھا بنایا، اور پاکیزہ چیزوں میں سے تمہیں رزق عطا کیا۔ وہ ہے اﷲ جو تمہارا پروردگار ہے۔ غرض بڑی برکت والا ہے اﷲ، سارے جہانوں کا پروردگار !

وہی سدا زندہ ہے، اُس کے سوا کوئی معبود نہیں ۔ اس لئے اُس کو اس طرح پکارو کہ تمہاری تابع داری خالص اُسی کیلئے ہو۔ تمام تعریفیں اﷲ کیلئے ہیں جو سارے جہانوں کا پروردگار ہے

(اے پیغمبر ! کافروں سے) کہہ دو کہ : ’’ مجھے اس بات سے منع کر دیا گیا ہے کہ جب میرے پاس میرے رَبّ کی طرف سے کھلی کھلی نشانیاں آچکی ہیں ، تو پھر بھی میں اُن کی عبادت کروں جنہیں تم اﷲ کے بجائے پکارتے ہو۔ اور مجھے یہ حکم دیا گیا ہے کہ میں تمام جہانوں کے پروردگار کے آگے سر جھکا دوں ۔‘‘

وہی ہے جس نے تمہیں مٹی سے پیدا کیا، پھر نطفے سے، پھر جمے ہوئے خون سے۔ پھر وہ تمہیں بچے کی شکل میں باہر لاتا ہے، پھر وہ تمہاری پروَرِش کرتا ہے تاکہ تم اپنی بھرپور طاقت کو پہنچ جاؤ، اور پھر بوڑھے ہو جاؤ۔ اور تم میں سے کچھ وہ بھی ہیں جو اس سے پہلے ہی وفات پا جاتے ہیں ۔ اور تاکہ تم ایک مقرر میعاد تک پہنچو، اور تاکہ تم عقل سے کام لو

وہی ہے جو زندگی دیتا اور موت دیتا ہے۔ اور جب وہ کسی کام کا فیصلہ کر لیتا ہے تو اُس سے صرف اتنا کہتا ہے کہ : ’’ ہوجا‘‘ بس وہ ہو جاتی ہے

کیا تم نے اُن لوگوں کو دیکھا جو ہماری آیتوں میں جھگڑے نکالتے ہیں؟ کوئی کہاں سے ان کا رُخ پھیر دیتا ہے؟

یہ لوگ وہ ہیں جنہوں نے اِس کتاب کو بھی جھٹلا یا ہے، اور اُس (تعلیم) کو بھی جس کا حامل بنا کر ہم نے اپنے پیغمبر بھیجے تھے۔ چنانچہ اِنہیں عنقریب پتہ لگ جائے گا